Mae deunyddiau sy'n ddigidol gynhwysol yn diwallu anghenion hygyrchedd drwy eu dyluniad a'u dull o gyflwyno. 

Sut gall technoleg helpu

Blackboard

Mae myfyrwyr yn gallu cael mynediad at ddeunyddiau dysgu ar gyfer cyrsiau a modiwlau drwy Blackboard. Gan ddefnyddio Rhith-amgylchedd Dysgu'r Brifysgol, gallwch gynhyrchu cynnwys cwrs sy'n ddigidol hygyrch.

• Defnyddiwch flogiau, fforymau trafod a chyfnodolion cwrs i greu ffyrdd newydd o ennyn diddordeb myfyrwyr yng nghynnwys y cyrsiau;
• Cynhyrchwch ddeunydd ar gyfer y cwrs gan ddefnyddio amrywiaeth o gyfryngau, er enghraifft podlediadau a fideos;
• Lle bo modd, defnyddiwch e-lyfrau a gefnogir gan y llyfrgell mewn rhestri darllen er mwyn cynyddu mynediad i fyfyrwyr.

Blackboard Ally

Gallwch gynhyrchu dogfennau ysgrifenedig sy'n cyd-fynd â chanllawiau safon cynwysoldeb digidol gan ddefnyddio'r swyddogaeth newydd yn Blackboard i wirio a gwella sgoriau hygyrchedd dogfennau (Blackboard Ally).

Sensus Access

Mae Sensus Access yn darparu Technoleg Cynhwysiant sy'n caniatáu i fyfyrwyr a staff drosi dogfennau i ystod o gyfryngau amgen eraill yn awtomatig, gan gynnwys llyfrau sain, e-lyfrau a Braille digidol. Mae modd defnyddio'r gwasanaeth hefyd i drosi dogfennau anhygyrch, fel ffeiliau PDF sy'n ddelweddau yn unig, lluniau JPG a chyflwyniadau Microsoft PowerPoint yn fformatau mwy hygyrch a haws.

Office 365 

Mae canllawiau defnyddiol ar sut i greu dogfennau hygyrch wedi'u cynhyrchu gan Microsoft. 

• Gwnewch eich dogfennau Word yn hygyrch i bobl sydd ag anableddau.
• Gwnewch eich cyflwyniadau yn hygyrch i bobl sydd ag anableddau. 

Cynghorion ar gyfer creu adnoddau sy'n ddigidol hygyrch

• Defnyddiwch ganllawiau arferion gorau ar gyfer creu dogfennau cynhwysol wrth eu creu o'r newydd.
• Defnyddiwch offeryn lanlwytho Blackboard i wirio a chywiro cynwysoldeb hen ddogfennau.
• Nodwch ddogfennau anaddas a gweithiwch gyda'r llyfrgell i ddod o hyd i ddewisiadau amgen cynhwysol.
• Defnyddiwch adnoddau sydd ar gael yn rhwydd/adnoddau ar-lein ar gyfer testunau craidd.
• Cynhyrchwch ddeunydd ar gyfer y cyrsiau gan ddefnyddio amrywiaeth o gyfryngau.
• Trefnwch gynllun ac ymddangosiad modiwlau Blackboard fel eu bod yn gyson ar draws y cyrsiau.
• Ymgorfforwch hygyrchedd wrth gynllunio.

Dolenni defnyddiol:

• Hyfforddiant Sensus Access. 
  
• Hygyrchedd Microsoft.
• Hygyrchedd yn Windows 10
• Deunydd JISC Rich fel technolegau cynorthwyol. 
• Deunydd JISC Rich ar eich Rhith-amgylchedd Dysgu – polisi hygyrch? 

Mae dysgu'n digwydd mewn gofod dysgu. Gall y gofodau dysgu gynnwys

• Ystafelloedd dosbarth neu ddarlithfeydd ar gampws. 
• Y llyfrgell. 
• Gofodau cymdeithasol neu fannau cyfarfod. 
• Blackboard. 
• Gofodau cymdeithasol neu fannau cyfarfod rhithwir. 
• Mynediad i lyfrau a chyfnodolion ar-lein drwy'r rhyngrwyd, catalog llyfrgelloedd ar-lein ac e-lyfrau. 

Sut gall technoleg helpu

Panopto

Drwy ddefnyddio teclyn cipio darlithoedd y Brifysgol, gallwch recordio darlithoedd tra byddwch yn eu traddodi. Gallwch hefyd ddefnyddio'r recordydd bwrdd gwaith i wneud fideos neu gyflwyniadau llais ar unrhyw adeg sy'n addas i chi. Bydd y feddalwedd hefyd yn caniatáu i chi ffrydio eich hun yn fyw. Mae defnyddio Panopto yn golygu: 

• Bod myfyrwyr nad ydyn nhw'n gallu cael mynediad i'r gofod dysgu ffisegol yn gallu bod yn bresennol mewn darlithoedd a gweld deunydd darlithoedd mewn lleoliad gwahanol;
• Bod myfyrwyr sydd ar gyrsiau dysgu cyfunol neu ddysgu o bell yn gallu gweld darlithoedd o ble bynnag maen nhw ac ar amser sy'n addas iddyn nhw;
• Bod modd rhyngweithio â myfyrwyr drwy'r teclynnau gadael sylwadau a thrafod yn Panopto;
• Bod modd i fyfyrwyr sy'n ffafrio dysgu drwy wylio fideos ddefnyddio'r recordiadau o'r darlithoedd i adolygu'n fwy effeithiol; 
• Bod modd i fyfyrwyr anabl sy'n wynebu anawsterau mewn sefyllfaoedd darlithio - o ganlyniad i nam ar y synhwyrau, anawsterau dysgu penodol, problemau'n ymwneud â phrosesu a chofio, anawsterau cymdeithasol a chyfathrebu a phryderon iechyd meddwl - gymryd rhan.

Adnodd FindARoom

Mae FindaRoom yn adnodd sy'n gallu helpu myfyrwyr i ddod o hyd i'w hystafell addysgu ar bob un o gampysau'r Brifysgol. Gallwch gynnwys dolenni at ystafelloedd addysgu yn eich cyhoeddiadau.

Offeryn ymateb ar gyfer y gynulleidfa

Mae offer ymateb ar gyfer y gynulleidfa yn caniatáu i fyfyrwyr gyfrannu'n ddienw ac yn dawel, a phan gânt eu defnyddio mewn gofod dysgu gallant ehangu cyfranogiad myfyrwyr. Offeryn ymateb ar gyfer y gynulleidfa sy'n cael ei gefnogi gan y Brifysgol yw Vevox. 

Drwy ddefnyddio Vevox, gall myfyrwyr

• ofyn cwestiynau; 
• ateb cwestiynau; 
• ymuno â thrafodaethau;
• cwblhau cwisiau a gwirio'u dysgu.

Blackboard Collaborate

Mae gan Blackboard nifer o offer cydweithio sy'n caniatáu i chi gyfathrebu a chydweithio gyda'ch myfyrwyr ar-lein. Gall offeryn parod Blackboard Collaborate eich galluogi: 

• I gwrdd â myfyrwyr neu grwpiau o fyfyrwyr nad ydyn nhw'n gallu dod i gyfarfodydd neu seminarau;
• I recordio'r cyfarfodydd hynny i'w gwylio gan fyfyrwyr sy'n gallu neu ddim yn gallu dod i'r cyfarfodydd;
• I ddarparu man cyfarfod diogel ar-lein ar gyfer gwaith grŵp lle nad oes angen i bob myfyriwr fod yn yr un lle; 
• I agor drws eich ystafell ddosbarth i ddarlithwyr gwadd, arbenigwyr, a gweithwyr proffesiynol eraill na fyddai myfyrwyr yn cael cyfle i'w cyfarfod fel arall. 

Yn ogystal, gall fforymau trafod a blogiau Blackboard helpu myfyrwyr i weithio gyda'i gilydd ar-lein.

Cynghorion ar gyfer creu gofod dysgu digidol cynhwysol:

• Dilynwch bolisi Dyfeisiau Symudol yn yr Ystafell Ddosbarth y Brifysgol sy'n caniatáu i fyfyrwyr ddefnyddio technoleg fel gliniaduron, llechi a dyfeisiau symudol yn yr ystafell ddosbarth er mwyn dysgu;;
• Recordiwch ddarlithoedd yn fyw neu rhag-recordiwch ddeunydd;
  
• Amrywiwch yr addysgeg i gyd-fynd ag anghenion amrywiaeth o ddysgwyr a defnyddiwch dechnoleg i gefnogi hyn e.e. defnyddio dull dysgu ben i waered rhannol;
• Byddwch yn ymwybodol o dechnoleg a defnyddiwch dechnoleg i greu gofodau dysgu ar-lein;
• Trefnwch gynllun ac ymddangosiad modiwlau Blackboard fel eu bod yn cyd-fynd â Pholisi Gofynion Sylfaenol ar gyfer Modiwlau a'u bod yn gyson ar draws cyrsiau i helpu myfyrwyr i we-lywio o amgylch y gofod digidol. 

Dolenni defnyddiol:

• Tudalen technolegau cynorthwyol y Gwasanaeth Anabledd. 
• Hygyrchedd porwyr gwe. 
• Cipio darlithoedd gyda Panopto. 
• Blackboard Collaborate. 
• Canllaw Prifysgol East Anglia ar Ddysgu ac Addysgu Cynhwysol.

Gall teclynnau digidol gynyddu mynediad myfyrwyr at asesiadau ffurfiannol a chyfunol, ac at adborth pwysig. 

Asesu: Sut gall technoleg helpu

Teclynnau arholiad cynorthwyol ar gyfer arholiadau cyfunol

Mae'r Gwasanaeth Anabledd yn darparu gwybodaeth i staff ar sut i wneud addasiadau rhesymol / hwyluso trefniadau mynediad ar gyfer profion dosbarth yn ystod y flwyddyn. 

Blackboard

Gallwch ddefnyddio'r swyddogaethau yn Blackboard i greu asesiadau ar ffurf:

• Blogiau.
• Cyfnodolion.
• Wicis.
• Cyflwyniadau drwy lanlwytho ffeiliau (cefnogir ystod eang o fathau o ffeiliau).

Panopto

Mae myfyrwyr yn cyflwyno aseiniadau sain a fideo i'r cwmwl yn Panopto. Er mwyn gallu derbyn aseiniadau gan fyfyrwyr, mae angen i chi greu ffolder aseiniadau yn eich modiwl ar Panopto. Yna, gall myfyrwyr lanlwytho recordiadau a wnaed ar unrhyw ddyfais i'r ffolder yma gan ddefnyddio ap Panopto neu'n uniongyrchol i'r cwmwl gan ddefnyddio cyfrifiadur personol/Mac. Mae mynediad am ddim i recordydd Panopto i fyfyrwyr, a gallan nhw ei ddefnyddio i greu eu haseiniadau os ydyn nhw'n dymuno.

Microsoft PowerPoint

Mae modd defnyddio Microsoft PowerPoint i recordio cyflwyniadau llais ar gyferasesiad ffurfiannol neu gyfunol. Er mwyn defnyddio'r swyddogaeth yma, gosodwch PowerPoint ar eich cyfrifiadur personol neu'ch dyfais (nid yw ar gael ar hyn o bryd drwy'r fersiwn ar-lein o Office 365). Gellir cadw cyflwyniadau gyda llais fel ffeil fideo ac yna eu lanlwytho i Panopto.

Turnitin

Gallwch ddefnyddio'r nodwedd Adolygu gan Gyfoedion yn Turnitin ar gyfer tasgau asesu ffurfiannol a chyfunol. 

Adborth: Sut gall technoleg helpu

Turnitin

• Defnyddiwch y swyddogaeth adolygu gan gyfoedion yn Turnitin i ganiatáu i fyfyrwyr roi adborth i'w gilydd at ddibenion asesu ffurfiannol.
• Defnyddiwch y nodwedd sylwadau llais yn Turnitin yn ogystal â'r man nodi sylwadau ysgrifenedig i roi adborth i fyfyrwyr am eu gwaith.

Panopto

• Defnyddiwch y nodwedd sylwadau yn Panopto i adael adborth llais neu ysgrifenedig i'ch myfyrwyr am eu gwaith.
• Defnyddiwch Panopto i greu cynlluniau marcio siarad neu i recordio adborth cyffredinol ar gyfer dosbarthiadau ar eu hasesiadau.

Cynghorion ar gyfer sicrhau asesiadau ac adborth sy'n ddigidol gynhwysol

• Defnyddiwch Blackboard i gadw trefn ar gynnwys eich modiwl mewn ffolderi, a chrëwch asesiadau yn y Ffolder Asesiadau yn unig; 
• Defnyddiwch y swyddogaeth sylwadau yn Turnitin i recordio adborth sain i fyfyrwyr, neu defnyddiwch Panopto; 
• Defnyddiwch ddulliau asesu amrywiol yn lle aseiniadau ysgrifenedig, er enghraifft defnyddiwch gyflwyniadau fideo llais, portffolios, wicis, cyfnodolion neu flogiau;
• Adeiladwch hyblygrwydd a chyfwerthoedd yn eich asesiadau. Bydd hyn yn caniatáu i fyfyrwyr gyflwyno gwaith drwy amrywiaeth o gyfryngau i fodloni'r un meini prawf;
• Cynhyrchwch a defnyddiwch gynllun marcio siarad ar gyfer asesiadau ffurfiannol a chyfunol. 

Dolenni defnyddiol:

• Asesiad Cynhwysol JISC. 
  
• Canllaw JISC ar wneud asesiadau yn hygyrch: Ystyriaethau a gofynion i sefydliadau wrth ddylunio asesiadau hygyrch a chynhwysol. 
• Fframwaith yr Asiantaeth Sicrhau Ansawdd ar asesu 
  
• QAA framework on assessment.
• Saith Cam gan Brifysgol Plymouth tuag at sicrhau Asesu Cynhwysol.